Франциянинг «Пари Сен-Жермен» клуби бош мураббийи Карло Анчелоттининг билдиришича, клуб ўз молиявий имкониятлари кенг бўлишига қарамасдан янги футболчиларга ўзини оқламайдиган даражада катта пул сарфламайди.

— Ҳа, Парижда энди пул бор, бунинг шарофати билан клуб аввалгига нисбатан кўпроқ ўйинчи харид қилиши мумкин, — дея итальян мутахассисининг сўзларини келтиради France Football. — Январда биз реал пуллар тўлаб, аъло даражадаги ўйинчиларни харид қилишимиз мумкин эди. Карлос Тевес трансферига тўхталадиган бўлсам, биз футболчи ва унинг агенти билан нарх борасида келиша олмадик. Лекин бу билан биз «ПСЖ» нима қилиб бўлса-да, футболчи харид қилмаслигини билдириб қўйдик. Бу ердагилар пулни санашни билишади. Умуман олганда, амалга оширилган трансферлардан кўнглим тўқ. Тўрт янги футболчидан фақат бир нафари француз эканлигига қарамасдан, жамоа ўзаги маҳаллий футболчилардан иборат бўлишига ҳаракат қиламиз.

Эслатиб ўтамиз, қищки трансфер дарчаси мобайнида «ПСЖ» сафига бразилиялик ҳимоячилар Максвелл ва Алекс, француз посбони Ронан Ле Кром, шунингдек, Италия терма жамоаси ҳавбэки Тьяго Мотталар келиб қўйшилишди.