Янги чемпионатга жиддий тайёргарлик кўраётган Ғузорнинг «Шўртан» клуби 19 январда БААнинг Дубай шаҳрига учиб кетганлиги ҳақида хабар бергандик.
Икки ҳафта мобайнида Игорь Криушенко шогирдлари Дубай шаҳрида мавсумолди йиғини доирасида тўртта ўртоқлик учрашувини ўтказишди.
Маҳаллий «Ажман» клубига 1:2 ҳисобида имконият бой берилганидан сўнг, кейинги ўртоқлик баҳсида «Зенит» клуби 2:1 ҳисобида мағлуб этилди. Сўнгра БААнинг аралаш таркиби билан баҳс олиб борилди ва 1:2 ҳисобида мағлубиятга учралгач, сўнгги ўртоқлик учрашувида «Далянь Шайд» клуби рақиблик қилди ва хитойликлар 2:0 ҳисобида мағлубиятга учради.
Кеча Тошкент вақти билан соат 17:30 да Ғузорнинг «Шўртан» клуби футболчилари Дубай-Тошкент йўналиши бўйича мамлакатимизга қайтиб келишди.
Игорь Криушенко ўз шогирдларига 9 февралгача дам берди. Айнан 9 февраль куни «Шўртан» футболчилари пойтахтимиздаги «Ўзбекистон» меҳмонхонасига йиғилади ва 13 февраль куни Туркиянинг Анталия шаҳрига навбатдаги йиғинга учиб кетишади.
