Италия терма жамоасининг 36 ёшли марказий ҳимоячиси Жоржио Кьеллини Австрияга қарши баҳс олдидан умумий гуруҳ машғулотларига қайтди, дея хабар беради Football Italia нашри. Аммо, манба таъкидлаганидек, катта эҳтимол билан ҳимоячи ўйинни захирада бошлайди, чунки Роберто Манчини асосий ҳимоячилар Леонардо Бонуччи - Франческо Ачерби каби ўйинга тайёр футболчилар билан баҳсни бошлашни афзал кўрди.
Эслатиб ўтамиз, Кьеллини Швейцария терма жамоаси билан гуруҳ босқичи иккинчи тур учрашувида (3:0) жароҳат олган ва у учинчи тур ўйинида қатнашмаган эди. Италия ва Австрия ўртасидаги Евро-2020 1/8 финал учрашуви 26-июнь, шанба куни Лондондаги (Англия) "Уэмбли" стадионида бўлиб ўтади. Ўйин Тошкент вақти билан соат 23: 59да бошланади.
