Лондоннинг «Арсенал» клуби Украина терма жамоаси ҳужумчиси Роман Яремчукка қизиқиш билдирмоқда, деб хабар беради Voetbal Belgie.

Манбанинг хабарига кўра, инглиз клуби ёзги трансферлар вақтида ушбу футболчини сотиб олиш вариантини кўриб чиқади. «Канонирлар» Роман учун 20-25 миллион евро тўлаши кутилмоқда.

Шунингдек, украиналикка «Милан», «Вулверхемптон», «Ницца», «Вест Хем» ва «Вольфсбург» жамоалари ҳам бефарқ эмас.

Ўтган мавсумда 24 ёшли Яремчук «Гент» таркибида барча турнирлар доирасида 43 учрашув ўтказиб, 23 гол урди ва 8 та голга узатмани амалга оширди. Унинг клуб билан шартномаси 2025 йилнинг ёзигача амал қилади.