Куни кеча Девид Бекхэм Англия телеканалларидан биридаги «The Jonathan Ross Show» кўрсатувида иштирок этди.
Ҳаётидаги кўплаб қизиқ воқеаларни гапириб берган таниқли футболчини қизил карточка олганлиги ҳақидаги хабар кўпчиликнинг қизиқишига сабаб бўлди.
Гап шундаки, у 9 ёшли ўғли Ромеонинг ўйинини кўриш учун футбол академияси майдонига йўл олади. У борган пайтда 7 ёшли боллар ўртасида мусобақа бўлаётган экан. Ҳакам кутилмаганда бир болакайга қизил карточка кўрсатади. Ҳакам қизил карточкасини кўрсатиб турсин, энди гапни Бекхэмнинг ўзидан эшитинг:
«Жаҳлим чиқиб кетди. Ҳакамнинг олдига бориб, «7 ёшли болага ҳам қизил карточка кўрсатасизми? Қўполлиги ҳам жиддиймас” дейишимни биламан, чўнтагини ковлаб, қизил карточкасини чиқарди ва уни менга кўрсатди, тезда стадионни тарк этишимни талаб қилди. Ноилож ташқарига чиқишга мажбур бўлдим».
4 нафар фарзанди бўлган Бекхэм рафиқаси Виктория билан яна икки нафар фарзанд кўриш орзусида эканликларини ҳам ошкор этди.