Фарғонанинг «Нефтчи» клуби ОФК Чемпионлар Лигаси Плей-офф саралаш финал босқичи ўйинларида иштирок этадиган футболчилар ва расмийлар рўйхатини ОФКга тақдим этди.

Умумий рўйхатга 27 нафар футболчи ва 14 нафар клуб расмийлари киритилган. «Нефтчи» таркибида бирорта ҳам легионер футболчи йўқ. ОФК қоидаларидан келиб чиқиб фарғоналиклар камида уч нафар дарвозабон — Ҳислат Чилматов, Элдор Исабоев ва Фаррух Турдиалиевни рўйхатдан ўтказишган.

Эслатиб ўтамиз, «Нефтчи» ОФК Чемпионлар Лигаси саралаш плей-оффи финал босқичи доирасида БААнинг «Аш-Шабоб» клубига қарши майдонга тушади. Агар учрашув Фарғона клуби ғалабаси билан якунига етса, жамоа ОФК Чемпионлар Лигаси «D» гуруҳидан ўрин олади (гуруҳда «Персеполис» (Эрон), «Ал-Ҳилол» (Саудия Арабистони), «Ал-Ғарафа» (Қатар) клублари бор). Агар «Нефтчи» БАА клубига имкониятни бой берса, жамоа ОФК Кубоги «D» гуруҳидан ўрин олади (гуруҳда «Салгаокар» (Ҳиндистон), «Дофар» (Уммон), «Ал-Виҳдат» (Иордания) жамоалари бор).

«Аш-Шабоб» - «Нефтчи» учрашуви 18 февраль куни, Дубайдаги «Ал-Мактум» стадионида, Тошкент вақти билан 21:00да бошланади.