Эсингизда бўлса ЖЧ-2010 чорак финалида Уругвай ва Гана учрашганда Луис Суарес 120+2-дақиқада дарвозага кириб кетаётган тўпни қўли билан қайтарган ва қизил карточка олиб, майдонни тарк этган эди. Белгиланган пенальтидан эса Асамоа Гьян фойдалана олмаган, якунда пенальтилар сериясида Уругвай футболчилари ганаликларни мағлуб этишган эди.

Бугун бўлиб ўтган Африка миллатлар кубогининг ярим финалида ҳам Асамоа Гьяннинг «оёғи тортишиб» қолди. У 7-дақиқада замбияликлар дарвозаси томон белгиланган пенальтини рисоладагидек бажара олмади. Бу ўринда Замбия дарвозабони Кеннеди Мвинега қойил қолмасдан илож йўқ. Айнан у тўп йўналишини тўғри топиб, жамоасини голдан қутқариб қолди.

Бутун ўйин давомида ганаликлар жуда катта устунликка эришганликларига қарамасдан ўйин тугашига 15 дақиқа қолганда Замбия ҳужумчиси Эммануэль Маюка гол урди – 1:0!

Ўйин сўнгига қадар ҳисоб ўзгармай қолди ва Замбия ўз тарихида учинчи марта финалга йўл олди. Қора қитъанинг энг нуфузли турнирида 15-марта қатнашаётган Замбия камида 1974 ва 1994 йилги натижаларини такрорлаши мумкин. Ўшанда улар кумуш медал эгасига айланган эдилар.

Африка миллатлар кубоги-2012. Ярим финал.

ЗАМБИЯ – ГАНА 1:0 (0:0)
Гол: Эммануэль маюка (78).
Фойдаланилмаган пенальти: Асамоа Гьян (7-Гана)
Бош ҳакам: Муҳаммад Бенуза (Жазоир)
Бата. «Эстадио де Бата».