Ўзбекистон футбол ассоциациясида биринчи вице-президент Равшан Эрматов ҳамда Греция Дипломатия ва халқаро муносабатлар институти директори Андреас Андрианопоулос ўртасида учрашув бўлиб ўтди. Учрашув давомида Равшан Эрматов Греция билан ҳамкорликда икки мамлакат терма жамоалари ҳамда клублар ўртасида халқаро учрашувларни ташкил этиш, футбол мутахассисларини қайта тайёрлаш ва ўзаро тажриба алмашиш йўлида ҳар томонлама ҳамкорликни йўлга қўйиш яхши самара беришини таъкидлаб ўтди.
Андреас Андрианопоулос эса Ўзбекистон ва Греция Миллий ҳамда турли ёш тоифалардаги терма жамоалари ўртасида халқаро ўртоқлик ўйинларини ташкил этиш имконияти мавжуд эканлигини таъкидлади. Бу эса ўз навбатида мухлисларда қизиқиш уйғотади ва икки мамлакат футбол ташкилотлари ўртасидаги муносабатларга ижобий таъсир кўрсатади. Шунингдек, «Олимпиакос», «ПАОК» каби Европанинг номдор клубларида мураббийларимиз малака ошириши таклифи қўллаб-қувватланди.
Учрашув сўнгида Равшан Эрматов меҳмонга ЎФА таклифлар юзасидан ўзаро ҳамкорлик қилишга тайёр эканлигини билдирди.
