«Валенсия» ва «Реал Мадрид»да ўйнаган аргентиналик футболчи Эсекьель Гарай бутсаларини “михга илишини“ маълум қилди.

«Мен кўп йиллар давомида қаттиқ оғриқни бошдан кечириб майдонда ҳаракат қилдим. Пулни захирада ўтириб ёки шифохонада топишни хоҳламайман. Мен карьерамни ҳалол бошладим ва у билан ҳам худди шундай хайрлашмоқчиман»,– деди Гарай ўз ижтимоий тармоқларидаги аккаунтларида.

Гарай «Раcинг де Сантандер» жамоасидаги ёрқин ҳаракатлари билан «Реал Мадрид» эътиборига тушади ва 2008 йилда Мадридга кўчиб ўтади. У ердаги 3 йиллик фаолиятидан сўнг, «Бенфика», «Зенит» ва «Валенсия» жамоалари таркибида ҳаракат қилган. Унинг сўнгги клуби «Валенсия» бўлиб қолди.

Аргентина жамоаси таркибида у 32 та учрашувда майдонга тушган. 2014 йилги Жаҳон чемпионатида жамоа билан финалга қадар етиб борган Гарай 2008 йилги Олимпия чемпиони ҳисобланади.