«Милан» ҳужумчиси Златан Иброҳимович яна бир бор рақиб жамоа футбочлисининг юзига мушт туширди.
Италия Кубоги ярим финалидан ўрин олган «Ювентус»га қарши ўйинда Иброҳимович туринликлар дарвозабони Марко Сторарининг юзига урган. Бу ҳақда «Football Italia» интернет-нашри хабар бермоқда. Воқеа видеосини бу ерда кўриш мумкин.
Эслатиб ўтамиз, худди шунга ўхшаш воқеа ўтган ҳафта «Наполи»га қарши чемпионат учрашувида содир бўлган ва ўшанда неаполликлар ҳимоячиси Сальваторе Арониканинг юзига урган швециялик ҳужумчи учта ўйинга четлатилган.
Юз берган воқеа хусусида ўз фикрлари билан ўртоқлашар экан, «Ювентус» ҳимоячиси Жоржио Кьеллини «Милан» футбочлиси жазоланиши кераклигини айтиб ўтди.
«Иброҳимовичга нима бўлган ўзи? Ҳеч қандай шахсий масала йўқ бу ерда. Менимча, бунда ҳам ўтган якшанба куни «Милан» ва «Наполи» ўртасидаги ўйинда ҳодиса такрорланди, холос», деди Кьеллини.
«Умид қиламанки, кеча содир бўлган воқеани кимдир кўрган ва телевидение бунга эътиборни жалб қилади. Ҳа, баъзан ҳиссиётларни жиловлай олмай қолган вақтда ҳар нарса бўлиши мумкин, аммо ҳар ким қилмиши учун жазоланиши керак», деди «Ювентус» футболчиси.
«Тўғри, Иброҳимович ҳеч кимни ўлдириб қўйгани йўқ, аммо у якшанба куни қилган ишини такрорлади — бошқа бир кишининг юзига урди. Нима учун бундай бўлганини фақат тахмин қилишим мумкин, холос», деди «Ювентус» ҳимоячиси Жоржио Кьеллини.