Кот-д‘Ивуар терма жамоаси ҳужумчиси Дидье Дрогба Замбия терма жамоасига қарши Африка миллатлар кубоги финал учрашуви олдидан ўз фикрлари билан ўртоқлашар экан, рақиб жамоани ҳурмат қилишини айтиб ўтди.

Ушбу учрашув Замбия терма жамоаси учун алоҳида аҳамиятга эга. Замбия терма жамоаси финал учрашувини ўтказиш учун Габон пойтахти Либревилга боради — 1993 йили айнан шу шаҳарда Замбия терма жамоаси футболчилари жойлашган самолёт ҳалокатга учраган эди.

«Биз айнан ўз мамлакатимиз учун ғалаба қозонишни истар эдик. Мамлакатимиз фуқаролар урушидан кейин энди-энди тикланмоқда, шуни ҳам ҳисобга олиш керак. Одамларга атрофда салбий нарсалардан ҳам бошқа нарсалар борлигини кўрсатиш, ҳамюртларимизда ҳаётга бўлган ишончни уйғотиш керак», деди Дрогба.

«Бўлажак ўйинда биз шубҳасиз ғалаба қозонамиз, дейишни хоҳлардим, аммо мен Замбия терма жамоасини ҳам, унинг ўйини учун, ҳурмат қиламан. Шунинг учун ҳам биз финал ўйинига жуда ва жуда жиддий муносабатда бўламиз. Кўрамиз, ҳаммаси нима билан тугаркин», деди Дрогба.

«Одамлар нима учун Замбиянинг ўзига хос иштиёқи ҳақида гапираётганликларини тушуниб турибман. Лекин ҳар кимда ғалаба учун ўз сабаблари бор ва у сабаблар қайғули бўлиши ҳам мумкин. Бизни анчадан бери мусобақа фаворитлари билан тўқнаш келмоқдамиз. Агар финалда ғалаба қозона олмасак, шунчаки майдонга ўтириб қоламиз. Замбиянинг ғалаба учун ўз сабаблари, бизда эса ўз омилларимиз бор. Ўйинда эса кучли жамоа ғалаба қозонади», дея қўшимча қилди Кот-д‘Ивуар терма жамоаси ҳужумчиси Дидье Дрогба.

Африка миллатлар кубоги финал учрашуви 12 февраль, якшанба куни, Тошкент вақти билан 24:00да бошланади.