Diario Sport нашри хабарига кўра, "Барселона" собиқ футболчиси Лео Месси жамоада қолмоқчи бўлган ва футболчи шартномадаги вазият бундай ривожланганидан ҳайрон.

Пайшанба куни аргентиналик Каталонияга келганида, у шунчаки шартнома имзолайман деб ўйлади. Шунингдек, жума куни жамоа билан машғулотларга қайтишни мақсад қилганди.

Лионелнинг отаси ва агенти Хорхе Месси кеча клуб офисига келди, янги шартнома имзоланишини кутди, аммо "Барса" президенти Жоан Лапорта ундан узр сўради ва клуб Мессини рўйхатдан ўтказа олмаслигини айтди.

Ўшанда аргентиналикнинг вакили Леонинг "Барса"да қолиш учун маошини янада камайтиришга тайёрлигини айтди.

Месси оиласи Каталония раҳбариятига вазиятни таҳлил қилиш учун вақт берди. Бироқ, бир неча соатдан сўнг, "Барса" вакиллари Лионель билан боғланиб, маош чегарасини четлаб ўтишнинг иложи йўқлигини айтишди.

Месси оиласига яқин манбалар, форвард бошқа клублар билан расмий музокара ўтказмаганига ишонтирмоқда, чунки у "Барса" билан шартномасини узайтиришига ишонган. Энди эса Месси Европа клубларининг таклифларини тинглашга тайёр.