"Наполи" ва Италия терма жамоаси ҳужумчиси Лоренцо Инсинье фаолиятини "Интер"да давом эттириши мумкин, деб хабар беради Sky Sport Italia нашри. Манбага кўра, футболчи "Наполи"нинг клуб президенти Аурелио Де Лаурентис билан зиддият туфайли шартномани узайтириш таклифини рад этган.
Инсиньенинг неаполликлар билан амалдаги шартномаси 2022-йилнинг ёзигача мўлжалланган. Маълум бўлишича, "Наполи" раҳбарияти Инсиньени 30 миллион еврога сотиш вариантини кўриб чиқмоқда.
Миланнинг "Интер" клуби форвард хизматларига қизиқиш билдирган.
Инсинье ўтган мавсумда "Наполи" таркибида барча мусобақаларда 48 та ўйинда майдонга тушиб, 19 та гол ва 11 та голли узатма муаллифи бўлган. Ҳужумчи Евро-2020да Италия терма жамоаси таркибида ўйнади ва жамоа билан Европа чемпиони бўлди.
