Ўз тарихида илк бор Африка чемпиони бўлган Замбия терма жамоаси футболчиларига ҳукумат томонидан ажратилган мукофот пули кўпчиликни ҳайрон қолдирди. Чунки бу мукофот Европада тўп сурадиган баъзи футболчиларнинг ҳафталик маошининг ярмича ҳам йўқ.
Замбия давлат спорт вазири Чишимба Камбвили Африка Миллатлар кубогида чемпионликка эришган терма жамоанинг ҳар бир футболчисига 59 минг доллардан мукофот берилишини маълум қилди.
“Бу ҳукуматнинг ҳиммати, хоҳловчилар термани истаганича мукофтлаши мумкин. Ҳиммат ўзларидан” деди жаноб Чишимба. Тўғри, дунё тажрибасидан маълумки, бошқа давлатларнинг чемпионлик учун ажратадиган мукофот пулидан бу сумма анча кам.
Лекин мамлакатда ялпи миллий маҳсулот киши бошига 1500 доллардан тўғри келади. Демак, мамлакатидан ташқарига чиқмаган футболчилар учун бу пул ҳам аслида ёмон эмас. Борига барака, яхши кунларга сарфлашсин.
