Нонушта маҳали "Локомотив" клуби мураббийлар штаби ўтирган стол атрофида асосий мавзу Элдор Шомуродов бўлди.

"Маълум тажрибага эга мураббий сифатида диёрингизга келган илк кунларданоқ сизда ёшлар анча иқтидорли эканлиги эътиборимни тортганди", – сўзида давом этарди бош мураббий Секейра, – "Аммо ушбу истеъдодли футболчилар “топ” жамоаларгача етиб бора олмаётганига эътибор қаратиб, балки фақат менинг таассуротимда улар иқтидорлидай кўринаётгандир деб ўйлагандим. Йўқ, ундай эмас экан. Адашмабман. Мана Элдор каби оддий бир ўзбек ўғлони Моуриньодек “топ” мураббий назарига тушиб, Европанинг кучли жамоаларидан бири сафига қўшилиб улгурибди-ки, демак, ҳақиқатан ҳам шундай: Сизда ёшлар жуда иқтидорли. Асосийси уларга тўғри йўналиш бера олсангиз бўлгани".

Тамадди баҳонасида бизни эшитиб турган ёш футболчиларга қараб, “Улар учун европалик мутахассиснинг сўзлари мотивацион таъсир қилгани ва дилларида Элдордек ютуқларга эришиш орзуси ўтгани аниқ”, деган ўй ўтди хаёлимдан. Зеро, барча буюк ишлар яхши ниятдан бошланади.

Аброр Пирриев
"Локомотив" клуби шифокори.