1932 йилнинг 23 январь куни Қўқон шаҳридаги машҳур академик Олим Аминов хонадонида таваллуд топган Элмар Аминов ўзбекистонлик футбол мухлисларига яхши таниш. Мустақилликдан кейин ташкил этилган Ўзбекистон футбол федерациясининг биринчи раҳбари сифатида фаолият олиб борган бу инсон шунингдек “Пахтакор” футбол клубининг илк жамоа бошлиғи экани билан ҳам машҳурдир.

Ўсмирлик вақтида шайбали хоккей бўйича Санк-Путурбург (Ленинград) чемпиони бўлган Элмар Олимович Геннадий Красницкий, Юрий Пшеничников, Биродар Абдураимов каби футболчиларнинг Собиқ Иттифоқ терма жамоасига таклиф этилишида ўзининг катта ҳиссасини қўшган.

Бугун ЎФФ фаҳрийлар кенгаши раиси Наримон Жалолов бошчилигида ташкилотнинг бир қатор раҳбарлари Элмар Олимович Аминовни қутлуғ ёш билан муборакбод этишди. Жумладан ЎФФ биринчи вице-президенти ва бош котиби Сардор Раҳматуллаев, терма жамоалар маркази директори Асқар Толибжонов, ЎзПФЛ бош директори Фарҳод Магомедов, ҳакамлар бошқармаси вакиллари Бобур Ҳайдаров ва Ноил Лутфулин, шунингдек футбол фаҳрийларидан Тўлаган Исоқов, Равшан Усмонхўжаев, Аҳрор Иноятов, Ахбор Имомхўжаев, Наримон Жалолов, Вильгелм Қаҳҳоров, Салим Эшмуҳамедов, Улуғбек Қориёқубов, Баҳодир Иброҳимов, Вячеслав Солохо, Лаврентий Илуридзелар иштирок этишди.

Наримон Жалолов нутқидан кейин сўз олган юбиляр ЎФФнинг эътиборидан ғоятда мамнун эканини ва даврадаги инсонлар билан бирга фаолият олиб борганидан бахтиёр эканини айтиб ўтди. Юбилей сўнггида Элмар Аминовга зарбоф тўн кийдирилди. ЎФФ вице-президенти Сардор Раҳматуллаев эсдалик совғалар қаторида Геннадий Красницкий номидаги медални ЎФФ президенти Мираброр Усмонов номидан Элмар Аминовга тақдим этди.

P.S. Элмар Аминов хизмат сафари билан Москвада бўлгани сабаб, ҳафта бошида пойтахт Тошкентга етиб келди. Шу сабабли уни тақдирлаш маросими сал кам бир ойга чўзилди.