Суперлиганинг 16-туридан ўрин олган «Сўғдиёна» - «Қизилқум» (2:1) учрашувидан сўнг мезбонлар бош мураббийи Улуғбек Бақоев фикрлари билан ўртоқлашди.

"Турнир жадвалидаги ўрнимиздан олиб қараганда биз учун ҳар бир очко олтинга тенг. Кўряпсизки, барча жамоалар деярли тенг кучга эга. Ҳеч бир клуб осон мағлуб бўлаётгани йўқ. Ҳар бирининг мақсади бор. Жамоам яхши ва тартибли ўйин кўрсатди. Бунинг учун уларни табриклайман. Олдинга интилишда давом этамиз. Танаффусда етарлича ҳордиқ чиқариб кейинги учрашувларга тайёргарлик кўрамиз. Ҳакамларга ортиқча эътирозим йўқ. Ўйин пайтида футболчилар, мураббийлар ҳиссиётларга берилишлари табиий ҳолат. Ҳиссиётларсиз футбол бўлмайди. Бундай ҳолатлар учраб туради.

«Қизилқум» кучли легионерларга эга жамоа. Буни ҳамма билади. Биринчи бўлимда Элгужанинг ўзида бир қанча хавфли вазиятлар юз берди. Маҳоратли ижрочилари исталган жамоага қийинчилик туғдира олади. Бугунг ҳам олдинги чизиқ вакиллари бизга қарши муносиб тўп тепди. Навоий шаҳри жамоасига кейинги баҳсларда омад ва зафарлар тилаб қоламан", — дейди Улуғбек Бақоев.