Маълум бўлишича, «Сити»га ўтишга тайёрланаётган Криштиану «Юнайтед»дан таклифни эшитибоқ, фикрини ўзгартирган. Табиийки, «Сити» дарҳол ўйиндан чиқди.

Хўш, энди нима бўлади?

«Юнайтед»га жарима майдони ичида фойдали бўладиган ҳужумчи зарур экани сир эмас. Шунинг учун ҳам бир амаллаб Эдисон Кавани яна бир йилга рози қилинганди.

Аммо АПЛ клублари вирус муаммоли бўлган мамлакатлар терма жамоаларига футболчиларни юбормасликлари ёки бориб келган футболчи 10 кун карантинда ўтириши маълум бўлгач, Кавани қарши чиқиб, нима қилиб бўлсаям, Уругвай ўйинларига боришни талаб қилаётганди. Олтита йиғин, ҳар сафар ўн кундан карантин - бу дегани, Кавани мавсумда кутилганидек фойдали бўлмайдигандек эди. Роналдунинг трансфери бу шароитда айни муддао.

Шундай бўлса-да, "Юнайтед" уч кун ичида баъзи ишларни амалга ошириш керак.

Энг муҳими, ҳозир ҳужум чизиғида футболчи ҳаддан ташқари кўп. Роналдунинг келиши муаммони яна кўпайтиради. Ҳужумчилар ичида Санчо, Рэшфорд ва Гринвуд тегиб бўлмайдиган номзодлар. Марсиял ва Жеймсга харидор ахтарилиши, Кавани билан иложи бўлса, шартнома бекор қилиниши, Эланга ва Амад Диаллога ижара жамоа топилиши керак. Хуллас, мана шу беш футболчидан камида 3 таси мавсумни "МЮ"да ўтказмаган тақдирдаям, жамоа олдинги чизиғида уч ўринга 6 футболчи бўлади.

Иккинчиси, Погба масаласи. Роналдунинг келиши унинг фикрини қанақа ўзгартиради, билмадиму, агар ПСЖ Мбаппени сотиб, Погбага харидор бўлса, кетиши мумкин. У ҳолда унинг ўрнига Саул, Невеш ёки Райс (тактик жиҳатдан энг зарури - ҳақиқий таянч) олиб келиниши зарур.

Зеро, Погба ва Роналдунинг бир таркибда югуриши (югурмаслиги)  ҳимояга анча бош оғриқ бўлиши турган гап.

Қаҳрамон Асланов.