Токиода давом этаётган паралимпия ўйинларида бугун 4 нафар дзюдочимиз иштирок этиши кўзда тутилган эди. Спортчиларимиздан ҳеч бир финалга чиқа олмади. Ҳамюртларимизнинг икки нафари кечки дастурда бронза медали учун татамига чиқадиган бўлди.

Эркаклар ўртасида -100 кг вазн тоифасида ҳамюртимиз Шариф Халилов бронза медали учун ўтиш баҳсида япониялик Ёшиказу Матсумотога қарши татамига чиқди. Ҳамюртимиз мезбон спортчига ҳеч қандай имкон қолдирмади ва иппон баҳоси эвазига ғалаба қозонди. Энди Шариф Халилов бронза медали учун бразилиялик Тенерио да Силвага қарши баҳс олиб боради.

Эркаклар ўртасида +100 кг вазн тоифасида ҳамюртимиз Ширин Шарипов ярим финалда грузиялик Реваз Чикоидзега қарши беллашди. Афсуски, “Олтин очколар”га қадар давом этган курашда Шарипов ҳакамлар томонидан 3 марта огоҳлантирилди ва шунинг эвазига мағлуб бўлди. Энди Ширин Шарипов бронза медали учун озарбойжонлик Илҳом Закиевга қарши татамига чиқади.

Эркаклар ўртасида -90 кг вазн тоифасида юртмиз шарафини ҳимоя қилаётган Шуҳрат Бобоев бронза медали учун ўтиш баҳсида қозоғистонлик Жанбота Аманжолга имкониятни бой бериб қўйди.

Аёллар ўртасидаги 70 кг. вазнгача бўлган Васила Алибоева эса жангларда иштирок этмади.