Вадим Абрамов мураббийлигидаги Ўзбекистон олимпия терма жамоаси Ироққа қарши ўйин олдидан расмий машғулотини ўтказди.

Қатарнинг «Ал-Араби» клуби уй учрашувларини ўтказадиган «Grand Hamad Stadium» аренаси олимпиячиларимиз ихтиёрида бўлди. Қайд этиш жойи, бугун Тошкент вақти билан 18:45 да бошланадиган ўйин ҳам айнан шу стадионда бўлиб ўтади.

Машғулот давомида мураббийлар штаби стандарт вазиятларга алоҳида эътибор қаратгани эътиборга молик. Терма жамоанинг асосий таркиб футболчиси – ҳимоячи Акбар Исматуллаев машғулот давомида кичик жароҳат олди. Айни пайтда унинг Ироққа қарши ўйинда иштирок этиши сўроқ остида турибди. Қолган барча футболчилар яхши ҳолатда. Жасур Хасановнинг бугунги ўйинда майдонга туша олмаслиги ҳақида хабар бериб ўтгандик.

Эслатиб ўтамиз, «Спорт» канали бугунги ўйинни жонли транслация қилади. Дастур ўйин бошланадиган вақтдан ярим соат аввал бошланади.