Бугун Европа чемпионлар лигасининг гуруҳ босқичига старт берилади. Илк тур доирасида «Барселона» ўз майдонида «Бавария»ни қабул қилади. Бу икки жамоа сафида 18 ёшли юксак иқтидор соҳиблари бор — Педри ва Мусиала.

Мусиала «Бавария»нинг бош жамоаси сафидан муқим жой эгаллашга улгурди. Ўтган мавсумда футболчига ўзини кўрсатиш имконияти берилди ва Мусиала бундан унумли фойдаланди: 32 ўйинда 9 гол. Жамол ушбу мавсумда ҳам янги бош мураббий Юлиан Нагельсманнга ўзининг фойдали ўйинчи эканини исботламоқда: 6та ўйинда 4та гол. Ёш Мусиала «Лейпциг»га қарши сўнгги учрашувда битта гол ва битта ассист муаллифига айланди.

Педри ўтган мавсумдаёқ барчани ўзига қарата олди. Роналд Куман уни нақ 52та ўйинда майдонга туширган бўлса, футболчи 4та гол ва 6та ассист муаллифига айланди. Бундан ташқари, 18 ёшли футболчи ёзда Европа чемпионати ва Олимпиадада иштирок этди.