Ўзбекистон олимпия терма жамоаси делегацияси 22 февраль куни, Тошкент вақти билан 11:30да Қатардан Бирлашган Араб Амирликларига йўл олади. Бу ҳақда ЎФФ расмий сайти хабар бермоқда.

Жамоа у ерда 25 февралга қадар бўлади ҳамда бу йиғин доирасида Лондон-2012 Олимпиадаси йўлланмасини қўлга киритиб бўлган Миср олимпия терма жамоасига қарши ўртоқлик учрашувида майдонга тушади. ЎФФ расмий сайтининг қайд этишича, ушбу баҳс 24 февраль куни ўтказилиши режалаштирилган.

«Айни вақтда, жамоа бош мураббийи Вадим Абрамов ҳамда делегациянинг бир қатор аъзолари, Ўзбекистон миллий терма жамоасининг Жанубий Кореяга қарши ўртоқлик учрашувида иштирок этиш учун Сеулга йўл олишади. Шу сабаб Мисрга қарши учрашувда олимпиячиларга Марат Мифтахутдинов ва Тоҳир Кападзе устозлик қилади», дейилади ЎФФ хабарида.

БААдаги йиғинлар якунига етганидан сўнг, олимпиячилар бир неча кунга Тошкентга қайтишади. Шундан сўнг навбатдаги — Туркия йиғинига йўл олинади. Кичик Осиёдаги йиғин 29 февраль – 9 март кунлари оралиғида бўлиб ўтади.

Эслатиб ўтамиз, Олимпиада-2012 3-саралаш босқичи сўнгги учрашувини Ўзбекистон олимпия терма жамоаси футболчилари БААлик тенгқурларига қарши ўтказишади. Ушбу баҳс 14 март куни Тошкентда бўлиб ўтади.