Кеча БАА Etisalat Амирлик кубогида навбатдаги тур учрашувлари бўлиб ўтди. Олтитадан жамоа икки гуруҳга бўлинган ҳолда ташкил қилинадиган мусобақада икки нафар ҳамюртимиз ҳаракат қилаётган "Эмирейтс" клуби ўз уйида Диего Марадона устозлик қилаётган "Ал-Васл"ни қабул қилди.

Ҳозирда мусобақа жадвалининг сўнгги поғонасини эгаллаб турган "Эмирейтс" гуруҳ пешқадамига қарши кечган учрашувда навбатдаги мағлубиятини тан олишга мажбур бўлди.

Учрашувни иккала легионерларимиз ҳам асосий таркибда бошлашди. "Стадион" нашрининг аниқлашича, Александр Гейнрих мезбонлар таркибида киритилган ягона голга муаллифлик қилган. Бироқ Сашанинг ҳисоб тенглаштирувчи голига олти дақиқа ўтиб Жуан Оливейра ўз голи билан жавоб берган ва жамоасига ғалаба келтирган. Бунгача учрашувнинг 20-дақиқасида "Ал-Васл"нинг учинчи рақамли футболчиси Ҳассан Али жамоасининг биринчи голини киритганди.

Ушбу мағлубият "Эмирейтс"нинг кубокдаги олтинчи мағлубияти бўлди. 9 учрашувда 5 очко (1 ғалаба, 2 дуранг) қайд этган жамоа мусобақанинг гуруҳ босқичи тугашига икки тур қолганда кейинги босқич йўлланмасини қўлга кирита олмаслиги ойдинлашди. Марадона бошчилигидаги "Ал-Васл" жамоаси эса 9 учрашувда 15 очко тўплаган ҳолда иккинчи ўринга кўтарилиб олди. Улар ҳисобида бешта ғалаба ва тўртта мағлубият бор.

Учрашувда иккала ҳамюртимиз ҳам тўлиқ 90 дақиқа мобайнида майдонда ҳаракат қилди. Бироқ бу жамоага ёрдам бера олгани йўқ.

БАА Etisalat Амирлик кубоги
А гуруҳи
9-тур

ЭМИРЕЙТС - АЛ-ВАСЛ - 1:2 (0:1)
Голлар: Александр Гейнрих (72) - Ҳассан Али (20), Жуан Оливейра (78).