Чемпионлар лигаси гуруҳ босқичининг 2-турида «Челси» «Ювентус» га 0:1 ҳисобида ютқазди.

«Кўклар» ҳужумчиси Ромелу Лукаку 90 дақиқа давомида ўйнади, лекин гол ура олмади. Шу тариқа, Лукаку кетма-кет барча турнирларда 4-учрашувда гол ура олмади. Аввалроқ, Лукаку Премьер-лиганинг «Тоттенхэм» (3:0) ва «Манчестер Сити» (0:1) жамоаларига қарши ўйинларида, шунингдек, «Астон Вилла» билан Лига кубогидаги учрашувда (1:1, пен. 4:3) майдонни голсиз тарк этган.

Бельгиялик футболчи «Челси»га қайтганидан кейинги дастлабки тўрт ўйинида 4 та гол урди. АПЛда «Арсенал»га (2:0) битта гол урган бўлса, «Астон Вилла» киперини икки марта ранжитган. Қолаверса, Чемпионлар Лигасида «Зенит»га (1:0) битта гол урганди.