Яхши биласиз, 25 октябрь - 6 ноябрь кунлари Сербиянинг Белград шаҳрида бокс бўйича жаҳон чемпионати ўтказилади.
Айни пайтда йигитларимиз мураббийлар штаби бошчилигида Тошкент вилоятининг Янгиобод базасида ўқув-машғулот йиғинларини олиб боришмоқда. Терма жамоамиз мураббийлари ҳар бир вазн тоифасида мамлакатимизнинг уч нафар боксчисини синовдан ўтказмоқда. Машғулотларнинг сўнгги босқичидан келиб чиққан ҳолда мураббийлар ЖЧда иштирок этадиган 13 нафар боксчимиз номини Сербияга жўнаб кетиш олдидан маълум қилишади. Бу эса ўз навбатида Ўзбекистон бокс федерацияси расмий сайти ва ижтимоий тармоқдаги расмий саҳифалари орқали эълон қилинади.
Яна бир маълумот: Бугун жаҳон боксида ўз ўрнига эга бўлган Куба терма жамоаси Тошкент вақти билан соат 02:40да юртимизга етиб келади. Ўзбекистон ва Куба терма жамоалари жаҳон чемпионатига тайёргарликнинг сўнгги босқичини биргаликда ўтказишади.
