Бундан бир неча кун илгари 2021 йил учун энг бой футболчилар рейтинги ҳақида маълумот бергандик. Энди навбат мураббийларга. Фақат бу маошлар бўйича эмас, умумий бойлик маъносидаги рақамлардир.
5-ўрин. Фабио Каннаваро
$100 000 000
2006 йил Италия терма жамоаси билан Жаҳон чемпионатида ғалаба қозониб дунёнинг энг яхши футболчиси дея эътироф этилган Фабио футболчилик фаолиятини якунлагач радарлардан йўқолиб қолди, гўё. Аслида собиқ ҳимоячи дастлаб араб шайхлари, сўнг эса хитойлик миллиардерлар билан ҳамкорлик қилди. Сўнгги жамоа “Гуангжоу Эвергранд” бўлган бу Фабио сўнгги 7-8 йил ичида мураббийлик ишидан 100 миллион АҚШ доллари ишлаб топди. Ўтган ойдан бошлаб ишсиз қолгач, энди у балки Европада ҳам кўриниш бериб қолиши мумкин.
4-ўрин. Зайниддин Зидан
$120 000 000
Франциялик мураббий албатта футболчилик фаолияти давомида ҳам дунёнинг энг кўп маош олувчи тўптепарларидан бири бўлган. Аммо мураббийликнинг ўзини олиб қарасак ҳам қисқа давр мобайнида у анча ўсишга эришганини кўриш мумкин бўлади. Ҳозирда ишсиз бўлиб турган бу мутахассис 120 миллион доллар маблағни “Реал”да ўтказган йиллари ишлаб топди. Қаторасига 3 маротаба ЧЛда ғолиб бўлиш орқали у ҳар қандай баланд маошга муносиб эканини исботлаб улгурган.
3-ўрин. Жозе Моуриньо
$120 000 000
“Рома”да йиллик 7,5 млн. евро ишлаб топаётган Жозе замонавий футболга ўзгача руҳ олиб кирган мураббийлардан бири ҳисобланади. Бундан ташқари, у совриндорлик борасида ҳам қолганлардан ажралиб туради. Йирик турнирлардаги 25та титул! Гарчи сўнгги йилларда унинг ғоялари эскиргандек кўринаётган бўлсада Муориньо ҳозиргача дунёдаги энг кўп иқтибос олинадиган футбол мураббийи ҳисобланади.
2-ўрин. Хосеп Гвардиола
$120 000 000
Қаерда Моуриньо бўлса ортидан Пеп Гвардиола номи ҳам келишига ўрганиб қолганмиз. Бу ерда ҳа шундай. Замонавий футболга гўзал ўйин услубини тақдим эта олган мураббий маошлар борасида анча камтарин. Унинг “Манчестер Сити”даги йиллик маоши, сўнгги маълумотларга кўра, 23 млн. фунт стерлингни ташкил этади. Албатта, испаниялик мутахассис “Барселона” ва “Бавария” мураббийи сифатида ишлаган чоғлари анча маблағ ишлаб топган. Ва унинг ҳам бойлиги 120 млн. доллар атрофида баҳоланмоқда.
1-ўрин. Диего Симеоне
$350 000 000
Рўйхатнинг Симеоне бошқараётганида ажабланаётганлар борми? Сўнгги йилларда баланд маоши билан мунтазам равишда бундай рейтингларда биринчи бўлиб келаётаган Диего мана 10 йилдирки “Атлетико”да ишлаб келмоқда. Унинг қолганларда фарқи албатта барқарор экани ва пулларга бўлган муносабатида. Бугунги кунда йиллик маоши 43 млн. евродан ўтувчи бу инсоннинг умумий бойлиги 350 млн. доллар атрофида баҳоланган. Нима ҳам дердик – Қойил!
Ориф Толипов.
