Бироз аввал Ўзбекистон Суперлигаси 23-тур доирасидаги сўнгги учрашув якунланди. «Андижон» ўз майдонида «Насаф»ни қабул қилиб, 1:1 ҳисобида дурангга имзо чекди. Ўйиндан кейин Қарши клуби устози Рўзиқул Бердиев ўйин ҳақида фикрлари билан ўртоқлашди.

- Бугунги баҳсда майдон билан ҳам, рақиб билан ҳам анча курашдик. Учрашувда футболчиларга яккакурашларда мағлуб бўлмаслик кўрсатмаси берилганди. Рақибимиз кўпроқ стандарт вазиятлардан ўз омадини синаб кўришини билардик ва жамоамга ҳам шу ҳақида кўрсатма берилганди. Афсуски, биринчи таймда айнан стандарт вазиятдан гол ўтказиб юбордик. Иккинчи бўлимда биз ўз ўйинимизни намойиш этишни бошладик. Ҳисоб тенглашгандан кейин ҳам Андрия Калудерович ва Ғолиб Ғайбуллаевда икки қулай вазият бўлди.

Голли вазият ҳақида гапирадиган бўлсам, билмадим, ҳакам нега бундай қарор чиқарди?! Ўзи ўйин бошланишидан олдин, бош ҳакам «Андижон» фойдасига кўп қарор чиқаришини билардик. Дарвозамиз томон белгиланган пенальти қўйилган ҳолат 11 метрлик жарима зарбаси белгиланадиган вазият эмасди. Ўйиндан аввал футболчиларим менга бугунги ўйинда ғалаба қозона олмаслигимизни айтишганди. Шу сабаб, ўйинни давом эттирмасликка қарор қилдик. Агар, биз мухлислар меҳрини қозонган бўлсак, ўз ўйинимиз, ғалабаларимиз орқали қозондик. Бизга ҳеч ким ёрдам бермаган.

ОФК кубоги финали ҳақида ўйлаганимиз йўқ, лекин кўплаб футболчиларимизда чарчоқ аломати бор эди. Бугунги баҳсда ҳар икки жамоага ҳам очко зарур эди. Сабаби, рақиб элитада қолишга, биз эса медаллар учун курашмоқдамиз.

Майдон ҳолатида ҳақида ҳам тўхталиб ўтмоқчиман, бу стадионда «Насаф» ўз ўйинини намойиш эта олмайди. Биз шароитларни тўғрилатишимиз керак. Бу каби шароитда футбол ўйнаб бўлмайди. Секейра ва Хуистранинг гапларига келадиган бўлсак, шароит ёмон бўлса гапириш керак, аммо қандайдир мисоллар келтириш хато, дейди «Насаф» устози ўйиндан кейинги матбуот анжуманида.