«Челси» ўз уй стадиони — «Стэмфорд Бридж»ни реконструкция қилиш ниятидан қайтди. Режага кўра, стадионнинг томошабинлар сиғими ҳозирги 42 мингдан 55 ёки 60 мингтагача кўпайтирилиши керак эди, деб ёзади «Челси» расмий сайти.

«Стадион сиғимини 60 минг ўрингача кўпайтириш бўйича режаларнинг амалга ошиши имконияти кам. Маҳаллий кенгаши билан олиб борилган музокаралардан сўнг биз шундай хулосага келдик», дейилади клуб баёнотида.

«Стадион сиғимини 60 минг ўрингача кўпайтириш клубга 600 миллион фунт-стерлинг (тахминан 951,35 миллион доллар)га тушади ва клубни камида уч мавсум давомида уй ўйинларини бошқа стадионда ўтказишга мажбур қилади. Бу режа иқтисодий томондан маъқул бўлган тақдирда ҳам, бошқа таваккалчиликлар олдини олиб бўлмасди. Стадион сиғимини 55 минг ўрингача кўпайтириш қиймати ҳам ҳаддан ташқари қиммат. Бироқ бу клуб янги стадион қуришга қарор қилди, деган хулоса бермайди», дейилади клуб баёнотида.

Қайд этиш жоиз, стадионни таъмирлаш ишларига унинг жанубий ва шарқий қисмидаги қўриқланадиган ҳудудлар, шунингдек, темирйўл линияси ҳалал бермоқда. Шунингдек, «Стэмфорд Бридж»дан унча узоқ бўлмаган жойда бир қатор бинолар, қабристон ҳамда турар-жой объектлари ҳам бор.