Мюнхеннинг «Бавария» клуби спорт директори Кристиан Нерлингернинг фикрича, унинг жамоаси ҳозир Германия Бундеслигасида чемпион бўлиш ҳақида ўйламаслиги керак. Бу ҳақда, немис нашрларига асосланиб, «Championat.com» интернет-нашри хабар бермоқда.

Германия чемпионати 24-турида «Байер»га қарши учрашувда учралган 0:2 ҳисобидаги мағлубиятдан сўнг мусобақа пешқадами, Дортмунднинг «Боруссия»си билан «Бавария» орасидаги очколар фарқи етти очкога етди.

«Биз афсусдамиз. Биринчи бўлимда рақиб дарвозасини ишғол этиш учун бизда қатор имкониятлар бўлди. Камида учта гол уришимиз мумкин эди, аммо уларнинг бирортасидан фойдаланмадик», деди Нерлингер.

«Агар биз ҳисобда олдинда бораётган бўлганимизда эди, ҳаммаси бошқача ривожланган бўларди. Иккинчи бўлимда бизга сабр етишмади — имкон қадар тезроқ гол уришга ҳаракат қилиб, охир-оқибат, қарши ҳужумларни ўтказиб юбордик», деди «Бавария» раҳбари.

«Чемпионлик учун имкониятларимиз қандай, деб сўраяпсизми? Ҳозир бу ҳақда гапирадиган вақт эмас. Биз ўйинимизни ўзгартириш ҳақида ўйлашимиз керак, соврин ҳақида эмас», дея қўшимча қилди «Бавария» спорт директори Кристиан Нерлингер.