«Наполи» ҳужумчиси Эсекиель Лавесси «Парма»га қарши ўйиндан сўнг ўз фикрлари билан ўртоқлашар экан, ўйиндан қониқиш ҳосил қилганини айтиб ўтди. Бу ҳақда «Sky Sport» хабар бермоқда.
Италия чемпионати 26-тур учрашувлари доирасида бўлиб ўтган «Парма» – «Наполи» учрашуви 2:1 ҳисобида неаполликлар ғалабаси билан якунига етди. Лавесси ғалаба тўпи муаллифига айланди.
«Мен ҳал қилувчи голни ура олганимдан хурсандман, жамоамиз ғалаба қозонганидан эса икки ҳисса қувоняпман», деди аргентиналик футболчи.
«Бугунги ғалабани биз осонликча қўлга киритганимиз йўқ. «Парма» ўз майдонида анча хавфли ўйин кўрсатади», деди Лавесси.
«Мусобақа жадвалидаги ҳолатдан келиб чиқиб айтадиган бўлсам, бугунги ўйинда қўлга киритилган уч очко биз учун ғоят муҳим аҳамиятга эга», дея қўшимча қилди «Наполи» ҳужумчиси Эсекиель Лавесси.