УЕФА Европа лигасининг гуруҳ босқичидан ўрин олган «Вест Хэм» ва «Рапид» жамоалари ўртасидаги ўйинда мезбон жамоа мухлисларининг стадионга киришини тақиқлади. Бу ҳақда "болғачилар" расмий сайти хабар тарқатди.

Бунга жамоа ишқибозларининг «Генк»ка қарши бўлиб ўтган сафардаги ўйинда (2:2) ўзларини тутиши сабаб бўлди. Бу баҳсда англиялик мухлислар стадионда тартибсизликни юзага келтирганди. Шунингдек, «Вест Хэм» 34 500 евро миқдорида жаримага тортилди. Жамоа УЕФАнинг ушбу қарори юзасидан баёнот берди.

«Клуб УЕФАдан ушбу қарор юзасидан зудлик билан изоҳ талаб қилади. Айниқса, ўйинга кам вақт қолганидан чиқарилган жазо чораси ўйинга чипта харид қилишга улгурган ва Австрияга бориш масаласини ҳал қилиб қўйган фанатларига бу ёмон таъсир қилади.

Ушбу жазо чораси бизни ҳайрон қолдирди, ўзини тартибли тутган ва бутун ўйин давомида жамоамизни қўллаб-қувватлаб турган мухлисларнинг ҳафсаласини пир қилди.

Клуб УЕФАдан ушбу жазо чораси юзасидан ёзма изоҳ беришни талаб қилди ва сўровимизга имкон қадар жавоб беришини сўради. Жавобнинг кечикиши клуб мухлисларига салбий таъсир кўрсатиши мумкин», — дейилади баёнотда.

«Рапид» — «Вест Хэм» учрашуви 25 ноябрь куни Вена шаҳрида бўлиб ўтади. Англияликлар 10 очко билан "H" гуруҳида пешқадам бўлиб туришибди.