Австралия терма жамоаси 15 август куни Эдинбургда Шотландия терма жамоасига қарши ўртоқлик учрашувида майдонга тушади. Бу ҳақда «Goal.com» интернет-нашри хабар бермоқда.

Австралия терма жамоаси бош мураббийи Хольгер Осиекнинг таъкидлашича, ушбу ўйин ЖЧ-2014 саралаш баҳслари олдидан яхши тайёргарлик вазифасини ўтаб беради.

«Биз ушбу учрашувдан сентябрь ойида бошланадиган саралаш баҳслари олдидан терма жамоа аъзоларининг имкониятларини билиб олиш учун фойдаланамиз. Шотландия ҳар доим кучли рақиб бўлган, айниқса, ўз майдонида», деди Австралия терма жамоаси устози.

Австралия ва Шотландия терма жамоалари шу кунгача тўрт марта тўқнаш келишган бўлса, шундан иккитасида британияликлар, ҳозирча сўнгги бўлиб турган 2000 йилги баҳсда «соккерузлар» 2:0 ҳисобида ғалаба қозонишган.

Эслатиб ўтамиз, Австралия терма жамоаси, Ўзбекистон термаси каби, ЖЧ-2014 саралаш Осиё минтақаси 4-босқич йўлланмасини қўлга киритган. 4-саралаш босқичига қуръа ташлаш маросими 9 март, жума куни бўлиб ўтади.