Хабарингиз бор, бугун севимли жамоамиз “Навбаҳор” Суперлиганинг 26-туридан ўрин олган баҳсда “Қўқон-1912”га қарши ўйин ўтказади. Таъкидлаш жоизки, мазкур учрашув жорий мавсум Намангандаги “Марказий” стадионида ўтадиган сўнгги расмий ўйин бўлганлиги сабабли, Coca-Cola Суперлиганинг тантанали ёпилиш маросими ҳам бўлиб ўтади.
Ёдингизда бўлса, “Навбаҳор” ПФК раҳбарияти ўтган йили Ўзбекистон кубоги доирасидаги “Насаф” билан ўйинга мухлисларнинг текинга киришига имконият яратиб берганди. Ушбу эзгу анъана давом этадиган бўлди: шахсан Наманган вилояти ҳокими, вилоят футбол ассоциацияси президенти
Шавкат Шокиржанович Абдураззақовнинг ташаббуси билан жорий мавсум “лочинлар”ни фаол қўллаб-қувватлаган фидойи мухлислар ва жамоамиз ўйинига бефарқ бўлмаган барчага мавсумни кўтаринки кайфиятда якунлашлари учун ажойиб совға тайёрланди – ишқибозларга “Навбаҳор” – “Қўқон-1912” ўйинини бепул томоша қилиш имконияти тақдим этилди. Ушбу учрашув водий дербиси мақомига эга эканлигини ҳам инобатга олсак, бу Қўқондан ташриф буюрадиган меҳмон мухлисларни ҳам қувонтириши шубҳасиз.
Шу муносабат билан, барчангизни 2021 йилги мавсумнинг “Навбаҳор” иштирокидаги сўнгги расмий учрашувини бевосита стадиондан кузатиш, севимли жамоамизни фаол қўллаб-қувватлаш учун “Марказий”га таклиф этамиз!
