Xabaringiz bor, bugun sevimli jamoamiz “Navbahor” Superliganing 26-turidan o‘rin olgan bahsda “Qo‘qon-1912”ga qarshi o‘yin o‘tkazadi. Ta’kidlash joizki, mazkur uchrashuv joriy mavsum Namangandagi “Markaziy” stadionida o‘tadigan so‘nggi rasmiy o‘yin bo‘lganligi sababli, Coca-Cola Superliganing tantanali yopilish marosimi ham bo‘lib o‘tadi.

Yodingizda bo‘lsa, “Navbahor” PFK rahbariyati o‘tgan yili O‘zbekiston kubogi doirasidagi “Nasaf” bilan o‘yinga muxlislarning tekinga kirishiga imkoniyat yaratib bergandi. Ushbu ezgu an’ana davom etadigan bo‘ldi: shaxsan Namangan viloyati hokimi, viloyat futbol assosiasiyasi prezidenti

Shavkat Shokirjanovich Abdurazzaqovning tashabbusi bilan joriy mavsum “lochinlar”ni faol qo‘llab-quvvatlagan fidoyi muxlislar va jamoamiz o‘yiniga befarq bo‘lmagan barchaga mavsumni ko‘tarinki kayfiyatda yakunlashlari uchun ajoyib sovg‘a tayyorlandi – ishqibozlarga “Navbahor” – “Qo‘qon-1912” o‘yinini bepul tomosha qilish imkoniyati taqdim etildi. Ushbu uchrashuv vodiy derbisi maqomiga ega ekanligini ham inobatga olsak, bu Qo‘qondan tashrif buyuradigan mehmon muxlislarni ham quvontirishi shubhasiz.

Shu munosabat bilan, barchangizni 2021 yilgi mavsumning “Navbahor” ishtirokidagi so‘nggi rasmiy uchrashuvini bevosita stadiondan kuzatish, sevimli jamoamizni faol qo‘llab-quvvatlash uchun “Markaziy”ga taklif etamiz!