Суперлиганинг 26-туридан ўрин олган "Қизилқум" - "Металлург" (1:3) учрашувидан кейин мезбонлар бош мураббийи Ҳамиджон Актамов матбуот анжуманида қатнашди.

"Мавсум тугади, ўзимизга ярашмаган ўринни эгалладик. Йил бошида режаларимиз бошқача эди. Иккинчи давра биз учун қийин ўтди.

Ўйин ҳақида гапирсак, биринчи таймда жамоам умуман ўйнай олмади, иккинчи таймда ўзимизга келдик, аммо вақт етмади. "Металлург" жамоаси ғалабани кўпроқ хоҳлади шекилли. Тўғри, биз ҳам ҳар бир баҳсга ғалаба учун тушамиз.

Йигитлар балки бугун осон ютамиз деб ўйлашдими билмадим. Барчадан узр сўрайман, қўлимдан келган ишларни қилдим. Бу футбол, ҳаёт давом этади. Туртилиб, суртилиб ўрганаман. Ишлашда жуда ҳам қўпол хатолар қилмадик, аммо камчиликларимиз бўлган бўлса уларни тўғрилашга ҳаракат қиламиз", - деди Актамов.

- Кейинги мавсум грузиялик футболчилар жамоада қоладими?
- Кейинги йил нима бўлишини худо билади. Менимча Навоийда катта ўзгаришлар бўлади. Жамоада ҳам, инфраструктура ҳам янгиланади. Қувондиқ Саноқулов бошчилигида футбол база, академия, стадионларимизни янгилаб бераман дедилар. Улардан жуда ҳам миннатдормиз. Равшан Эрматов ва Қувондиқ Саноқулов ҳозир катта лойиҳа устида ишлашмоқда. Ўйлайманки Навоийда энди футбол пайдо бўлади. Ҳозиргача биз олий лигада қўлимиздан келганича қатнашиб турдик. Аммо пойдевор бўлмаса натижа кўрсатиш қийин.