«Навбаҳор» клуби собиқ бош мураббийи Андрей Канчельскис полицияга мурожаат қилиб, Москва кафеларидан бирида ўзига нисбатан таҳдид қилинганини маълум қилди.

Мураббийнинг айтишича, ушбу ҳодиса «Навбаҳор» клуби билан боғлиқ. Канчельскис 2020 йилнинг октябрь ойида жамоани тарк этган бўлиб, россиялик мутахассис муддатидан аввал шартнома бекор қилингани учун ФИФАга мурожаат қилган ва ташкилот «Навбаҳор» зиммасига 1,6 млн евро миқдорида компенсация ундириш ҳақида қарор қабул чиқарган.

Кафеда ўтирган Канчельскиснинг ёнига юзига тиббий ниқоб тақиб олган 3 нафар эркак келган ва улардан бири мутахассисдан "Сиз ростдан ҳам Ўзбекистонда ишлаганмисиз, у ердаги маошингиз 80 минг долларга тенг бўлганми?", деган мазмунда сўраган. Мураббий буни тасдиқлаган.

Эркаклар эса унга суд орқали ҳеч нарса ололмаслигини, агар оладиган бўлса, унинг оёғини синдириб, ногиронга айлантиришини айтган.