"Навбаҳор"-"Қизилқум" учрашуви якунига етгач ҳар икки жамоа мураббийлари ўртасида матбуот-анжумани бўлиб ўтди

Мустафо БАЙРАМОВ ("Навбаҳор"):
— Мавсумнинг дастлабки учрашуви доим қийин ўтиб келган. Нурсиз дуранг албатта бизни қониқтиргани йўқ. Бугун ғалаба қозонишни истагандик, аммо ўйлаган мақсадимизга эриша олмадик. Бир қанча вазиятларни футболчилар йўққа чиқаришди. Жуда қулай жарима тўплари ҳам моҳирона бажарилмади. Айнан Алишер Маҳмудовнинг бугун бизга ёрдам бера олмаслиги қимматга тушди. Биласиз, Маҳмудов стандарт вазиятларни ажойиб амалга оширади. Шогирдларим олдига қўйилган вазифани бажаришга ҳаракат қилишди. Кейинги учрашувда керакли натижани қўлга киритишга ҳаракат қиламиз.

— Таркибдаги янги футболчилар ўйинидан қониқдингизми?
— Владимир Чекунов бугун ўзини кўрсата олмади. Қандайдир довдираш аломатлари сезилди унда. Жаъфар Ирисметов ва Артурас Фоменко ўзини кўрсатишга ҳаракат қилди.

— Меҳмонлар ўйини ҳақида нима дея оласиз?
— "Қизилқум" ҳимоявий ўйин кўрсатиб, очкони қўлга киритишди, биз эса қимматли икки очкони бой бердик.

— Максим Белихни қачон майдонда кўрамиз?
— Белих куни кеча сафга келиб қўшилди. Бир неча кун олдин бувиси оламдан ўтди. Шунинг учун бугунги учрашувга у тайёр эмасди. Албатта, кейинги учрашувларда ҳимоячи майдонда тўп суради.