Каталониянинг “Барселона” клуби қишки трансфер ойнасида сотиладиган футболчиларнинг якуний рўйхатини тузди. “Sport.es” сайти хабарига кўра, “кўк-анорранглилар” бирданига саккиз нафар футболчидан қутулишга тайёр.
Жамоа раҳбарияти ва мураббийлар штаби энди Серхиньо Дест, Самуэль Умтити, Клеман Ленгле, Оскар Мингеса, Иньяки Пена, Филиппе Коутиньо, Люк де Йонг ва Нето каби футболчиларни сотишга қарор қилишган.
Каталония клуби жорий мавсумда юқорироқ ўринларни эгаллаш учун ўз таркибини жиддий равишда янгиламоқчи. Жамоа Чемпионлар лигасида аллақачон муваффақиятсизликка учраган, гуруҳ босқичида турнирдан чиқиб кетган. Ла Лигага келсак, Хави Эрнандес 18-турдан кейин бор-йўғи 7-ўринни эгаллаб турибди. “Барса” “Реал”дан 18 очко ортда қолмоқда.
