"Интер Майами" ҳужумчиси Лионель Месси клублар миқёсидаги фаолиятида 800 та голлик маррани забт этди.
39 ёшли аргентиналик футболчи учун юбилей голи МЛС доирасида "Монреаль"га қарши якшанба куни ўтказилган учрашувда киритилди. Месси мазкур баҳсдаги иккинчи голи билан клублар сафидаги голлари сонини 800 тага етказди. Қўшиб берилган вақтда эса у хет-трикни расмийлаштириб, учрашувнинг якуний ҳисобини 7:1 кўринишига келтирди.
Inter Miami News Hub маълумотига кўра, Месси профессионал клублар сафида 800 та гол уриш учун 964 та учрашув ўтказган ва бу янги рекорд ҳисобланади.
Саккиз карра "Олтин тўп" соҳиби бу кўрсаткичда Криштиану Роналдуни ортда қолдирди. Португалиялик футболчига клублар миқёсида 800 та голга етиш учун 1060 та ўйин керак бўлган.
Месси "Интер Майами"га ўтишидан аввал "ПСЖ" ва "Барселона" клублари шарафини ҳимоя қилган.
