Айни пайтда Ўзбекистон футбол ассоциациясининг йил лауреатларини тақдирлашга қаратилган «UZ Football Awards» маросими бўлиб ўтмоқда. Ҳозиргина аёллар бўйича энг яхши тўпурар, йилнинг яхши мураббийи ва ўйинчиси совринлари ўз эгаларига топширилди.

Аёллар футболи бўйича «Олий Лига тўпурари»

Диёра Ҳабибуллаева "Сўғдиёна-W" жамоаси сафида жорий мавсум 19 та учрашувда майдонга тушиб, 32 та гол уришнинг уддасидан чиқа олди. Бу борада у 31 та гол урган ганалик жамоадоши Фусейна Мумуни ҳамда 30 та гол урган "Бунёдкор-W" аъзоси Дилдора Нозимовани ортда қолдиришга эришди.

Аёллар футболи бўйича «Олий Лиганинг энг яхши мураббийи»

Шерали Бобоқулов ушбу мавсумда «Олий Лиганинг энг яхши мураббийи» совринига лойиқ деб топилди. У «Сўғдиёна-W» жамоаси билан биргаликда Олий Лига олтин медали ва Ўзбекистон кубогини қўлга киритди.  

Аёллар футболи бўйича «Олий Лиганинг энг яхши футболчиси»

Ўзбекистон аёллар терма жамоаси етакчиларидан бири, «Сўғдиёна-W» жамоаси ва чемпионат тўпурари Диёра Ҳабибуллаева ушбу мавсумнинг «Олий Лиганинг энг яхши футболчиси» деб топилди.