Истанбулда УЕФА ижроия қўмитасининг икки кунлик учрашуви якунланди. Унда Евро-2020 мусобақасини ўтказиш учун ариза топшириш жараёни ҳақида қарор қабул қилинди.
Аzerisport.com сайти хабар қилишича, УЕФА таркибига кирувчи барча 53 миллий ассоцияцияларга стадионлар сони, уларнинг сиғими бўйича минимал критерийлар рўйхати акс этган таклифномалар юборилган. Ассоцияциялар 24 жамоа иштирок этадиган қитъа чемпионатини ўтказишга бўлган қизиқишларини 15 майдан кеч бўлмаган муддатгача маълум қилишлари шарт бўлади.
Агар фақат биргина ариза топширилса, УЕФА турнир мезбонини тасдиқлашдан аввал керакли кафиллик шартларини йиғиш билан шуғулланади.
Агар бир нечта ассоцияция қизиқиш билдирса, УЕФА номзодларга ариза ҳужжатлари тўпламини йиғиш учун 18 ой муҳлат беради.
Евро-2020 мезбони ҳақидаги якуний қарор 2013 йилнинг охири ва 2014 йилнинг бошида қабул қилинади.
Эслатиб ўтамиз, яқинда Озарбойжон парламенти (Милли Межилис)да сўзга чиққан Грузия Президенти Михаил Саакашвили Евро-2020 мусобақаси мезбонлиги учун Грузия ва Озарбойжон биргаликда ариза беришини айтиб ўтганди.
