«Манчестер Юнайтед» Англия чемпионатининг 19-тури доирасида бўлиб ўтган «Ньюкасл» билан ўйинда 167 маротаба тўп йўқотибди. 167 маротаба!

Тўп йўқотиш деганда, тўп назоратининг рақибга ўтганини билдиради, яъни ноаниқ паслар, зарбалар ҳам шулар жумласидан. Хўп, ўйинда манчестерликлар 13 марта зарба беришган, бу энди йўқотиш эмас, позитив нарса, деб айириб ташлаймиз — 154 та.

Энди янада чуқурроқ ёндошсак, футболда тоза вақт бор, яъни тўхталишларни чегириб ташлаганда, ўртача 50-60 дақиқа тўп ўйинда бўлади. Тўхталишлар кўп бўлди, шунинг учун майли, ўртача 55 дақиқа, дейлик.

55 дақиқанинг 61%ида «МЮ» тўпни назорат қилди статистика бўйича. Дақиқага ўгирсак, 33 бўлади. Демак, 33 дақиқада 154 марта, бир дақиқада эса, 4,67 марта тўп йўқотилган.

Хуллас, ўртача ҳар 13 секундда жамоа тўпни рақибга топшириб қўяверган. Рангник машғулотларга янги тизим олиб киргани, тўп эгаллангач, 10 сонияда ҳужумни якунлашга ҳаракат қилиниши лозимлиги айтилганди. Ўша шумикин?

Қаҳрамон Асланов.