Янги чемпионатга сўнгги тайёргарликни пойтахтимизда олиб борган Ғузорнинг “Шўртан” жамоаси ҳимоячиси Раҳматилло Бердимуродов учун “Қизилқум” жамоаси билан бўлиб ўтган ўртоқлик учрашуви кўнгилсиз якун топган эди.
Ўшанда Раҳматилло Бердимуродов ва Ҳамза Каримовлар кутилмаганда тўқнашиб кетганди ва Бердимуродов кўзидан жиддий жароҳат олганди.
Футболчининг соғлиги ва жамоа таркибига қачон қайтиб келиши ҳақидаги саволга клуб шифокори Тадеуш Переходдан жавоб олдик:
“Раҳматилло назоратимизда турибди. Ҳозир анча яхши бўлиб қолган, кўзидаги кўнгилсизликларнинг барчаси ортда қолди. Шу кунларда Бердимуродов сўнгги муолажаларни олмоқда. Насиб бўлса, “Навбаҳор” билан бўладиган учрашувдан сўнг, яъни 26 март куни таркибимизга келиб қўшилади ва машғулотларни давом эттиради”.
