Сурия ва Уммон олимпия терма жамоалари ўртасидаги учрашув олдидан ташкил этилган матбуот анжуманининг иккинчи қисмида машҳур франциялик мутахассис Поль Ле Гуэн ўз фикрлари билан ўртоқлашди.
- Эртага биз Сурияни мағлубиятга учратишга ҳаракат қиламиз ва буни ҳамма очиқ билиб турибди, - дея сўз бошлади Уммон олимпия терм жамоаси устози. – Албатта, қолган икки жамоа каби биз ҳам имкон қадар яхшироқ ўйин кўрсатиш ниятидамиз. Ҳар бир рақибимизга кутилмаган совға тайёрлай олишимизга ишонаман. Мени ташвишга солаётган ягона жиҳат, Вьетнамга келганимиздан бери бирорта ҳам талабга жавоб берадиган майдонда машғулотлар ўтказа олмадик. Биз шуғулланган майдонлар мусобақа савиясига умуман жавоб бермайди. Умид қиламанки, бош стадионнинг майдони яхшироқ ҳолатда.
- Масъулиятли ўйинлар олдидан Уммон терма жамоасининг аҳволи қай даражада?
- Бизда жароҳат олган бир қатор футболчилар бор, бироқ улар қисқа вақт ичида тикланиб, жамоага ёрдам беришга тайёр бўлишади. Умуман олганда, жамоа тайёргарлиги ёмон эмас ва у саралашнинг ўтган босқичидагидан кўра яхшироқ ўйин кўрсата олади.
- Рақибларнинг имкониятларни қандай баҳолаган бўлардингиз?
- Иккала жамоа ҳам деярли бир хил савияда. Биз, балки, қандайдир статистик кўрсаткичлар бўйича ортда қолаётгандирмиз, бироқ иштирокчиларнинг ҳақиқий кучини фақатгина бўлажак баҳслар кўрсатиб бера олади. Бироқ, қайд этиб ўтганимдек, менимча, Сурия ва Ўзбекистоннинг кучи деярли тенг.
Бахтиёр Маметов,
Ханой, Вьетнам
