«Барселона» клуби «Манчестер Сити»дан ҳужумчи Ферран Торресни 55 миллион еврога сотиб олди. Клуб бунча пулни бирдан тўлай олмайди. «Барса» спорт директори Алемани "шаҳарликлар" билан ушбу трансфер борасида қулай шартлар асосида келишувга эришган. Яъни, "кўк-анорранглилар" Ферраннинг трансфер пулини 4 йил давомида тўлаб боришади. Дастлабки тўлов эса 2022 йилнинг ёзида амалга оширилади.

«Барса» ҳозирда Торресни Ла лигада регистрациядан ўтказиш бўйича муаммога дуч келмоқда. Чунки, Ла лига ўйинчиларга тўланадиган маош борасида чеклов ўрнатган. Испаниялик футболчини рўйхатдан ўтказиш учун эса жамоа харажатлар билан бюджетини тозалаши керак. Бунинг учун жамоа ўйинчилардан бирини сотиши ёки ўйинчилар билан маошни камайтириш борасида келишиши лозим.

Жамоани тарк этиш учун асосий номзод — Усмон Дембеле. Франциялик футболчи янги шартнома борасида юқори маош талаб қилмоқда. Бу эса "Барса"ни асло қониқтирмайди. Diario Sport хабар тарқатишича, Дембеле ва унинг агентларига Торреснинг трансфери ёқмади. Боиси, футболчилар бир позицияда тўп тепишади. Бундан ташқари, раҳбарият Дембеладан маошни камайтиришни талаб қилган ҳолда Торрес билан шартнома имзолагани, Мората ва Холанд билан музокара олиб бораётгани уларни ҳайрон қолдирмоқда.