24 март куни Ўзбекистон олимпия терма жамоаси Вьетнам пойтахти Ханой шаҳрида ўзининг дастлабки машғулотларини ўтказди.

Маҳаллий вақт билан соат 17:00 да бошланган чигалёзди машқлари бир ярим соатга чўзилди. Жараён мобайнида мураббийлар штаби тез узатмаларни бир тепар усулда қайта ишлаш, югуруш, шунингдек дарвозага узоқдан зарба беришдек машғулотларга диққатни қаратишган.  Машғулот сўнгида жамоа 2 га бўлиниб, ўйнаб кўрган.

Амалий машғулотлардан сўнг олимпиячиларимизнинг назарий кўникмаларини ҳам оширишга эътибор қаратилган. Машғулотлар мобайнида, мураббийларимиз футболчилар билан суҳбатлашиб, жамоа олдида турган учрашувларнинг ўта муҳимлиги борасида гаплашишган.

Бугун шунингдек, Сурия ва Уммон терма жамоаларининг расмий машғулотлари бўлиб ўтган. Ўзбекистон олимпия терма жамоасидан фарқли ўлароқ, рақибларимизнинг машғулотлари "Май Дин" стадионида бўлиб ўтди. Олимпиада саралаш плей-оффининг дастлабки учрашуви эртага айнан шу стадионда бўлиб ўтади. Ушбу ўйин эртага, 25 март куни Тошкент вақти билан 17:05 да старт олади. Ўйинни Ўзбекистон терма жамоаси мураббийлар штаби стадионда томоша қилишади.

Бахтиёр МАМЕТОВ,
Ханой, Вьетнам