А Серия коронавирус пандемияси даврида ўйин ўйнаш учун янги протоколни расман тасдиқлади. Бу ҳақда Football Italia хабар бермоқда.
Италияда Covid-19 билан боғлиқ вазият яхшилангани учун бу мавсум бошида бундай протокол йўқ эди. Аммо декабрь ойида клубларда яна касалликнинг авж олиши бошланди.
Янги протоколга кўра, жамоада 13 нафар соғлом футболчи бўлса, ўйин ўтказиши мумкин. Учрашувга 2003 йил 31 декабрдан олдин туғилган, ўйиндан камида бир кун олдин Covid-19 тести манфий чиққан футболчилар иштирок этиши мумкин.
Агар жамоада камида 13 нафар шундай ўйинчи, шу жумладан битта дарвозабон бўлса, лекин у ўйинга келмаса, бундай жамоа 0:3 ҳисобида мағлуб бўлади.
