Ўзбекистон олимпия терма жамоаси сардори Фозил Мусаевнинг фикрича, терма жамоа билан Вьетнамга келган 3 нафар дарвозабонлардан бири асосий дарвозабон Санжар Қувватовнинг ўрнини боса олади. Қувватов саралашнинг гуруҳ босқичидаги дастлабки 4та ўйинда бирорта ҳам гол ўтказиб юбормаганди.

Лекин у Олий лига доирасида "Машъал" сафида "Бунёдкор"га қарши ўйинда тиззасидан жароҳат олгани туфайли саралаш баҳсларига кела олмади. Вьетнамга делегация сафида "Бунёдкор" посбонлари Акбар Тўраев ва Виктор Мочалов ҳамда "Насаф" дарвозабони Элдорбек Суюнов ташриф буюрган. Улардан қайси бирига ишонч билдиришни аниқлаб  олиш учун Вадим Абрамовнинг ихтиёрида бир неча кун вақт бор.

"Санжар — жуда яхши дарвозабон. У саралаш мусобақаси давомида юқори савияда ўйнади. Фақат сўнгги 2та ўйин давомида бироз унинг омади чопмади", дейди Мусаев www.the-uff.com сайтига берган интервьюсида.

23 ёшли футболчи 2009 йили Мисрда ўтказилган 20 ёшгача бўлган футболчилар ўртасидаги жаҳон чемпионатида Қувватов билан бирга тўп сурган.

"Ханойга келган 3 нафар дарвозабонларнинг савияси Санжарникидан кам эмас. Биз уларга ишонамиз. Улар бемалол Қувватовнинг ўрнини боса олишади", дейди олимпиячиларимиз сардори.