Мавсум бошида қуръа омадли келиб, ўз майдонида ўртамиёналарга қарши 2 та кетма-кет учрашув ўтказиши аниқ бўлган "Шўртан" ҳар иккала учрашувни ҳам ғалаба билан якунламоқда.
Бугун Ғузордаги марказий стадионда Наманганнинг "Навбаҳор" клуби янги мавсумнинг дастлабки йирик ҳисобдаги мағлубиятига лойиқ ўйин кўрсатди.
Ғузорликлар жуда тезкор гол киритишнинг уддасидан чиқишди. Стадион сухандони жамоалар таркиби билан таништириб бўлишга улгурмасиданоқ Темур Султонов яхши зарбавий позицияга чиқарилди унинг берган зарбасини меҳмонлар посбони Романенко қайтарди, бироқ такрорий зарба беришда Афонин адашмади – 1:0.
Орадан кўп ўтмай Игорь Таран ҳисобдаги фарқни оширди. Бу вазиятда бурчак зарбасидан сўнг рақиб жарима майдонига ҳаволатилган тўп қулай позиция эгаллаган Таранга келиб тушди ва Игорь қийинчиликсиз янги мавсумдаги иккинчи голини киритди.
Бу футболчи танаффусгача ҳисобнинг йирик кўриниш олишига сабаб бўлган жамоанинг ушбу ўйиндаги, ўзининг эса мавсумдаги учинчи голини ҳам киртишга муваффақ бўлди. 31-дақиқада яна бурчак зарбасидан оширилган тўпни Мўйдин Мамазулунов орқароқда турган Таранга боши билан етказиб берди, Таран эса деярли бўш қолган дарвозани "пойлаш"да адашмади – 3:0!
Иккинчи бўлимнинг учдан бир қисми якунланаётганда Мўйдин Мамазулуновнинг ўзи ҳам якуний голни киритди. У Понамерёвнинг ўнг қанотдан етказган пасини чаққонлик билан қайта ишлаб, дарвозани нишонга олди — 4:0!
Учрашувнинг 74-дақиқасида меҳмонлардан Санжар Асқаралиев ҳамкам билан тортишганлиги учун иккинчи сариқ карточкага лойиқ кўрилди ва майдондан четлатилди.
Учрашув давомида ғузорликларда ҳам, наманганликларда ҳам гол уриш мумкин бўлган бир неча вазиятлар содир этилди. Бироқ, ҳисоб ўзгармади.
Ўзбекистон Профессионал Футбол Лигаси-2012. 2-тур.
ШЎРТАН – НАВБАҲОР 4:0 (3:0)
Голлар: В.Афонин (2), Игорь Таран (16, 31), Мўйдин Мамазулунов (61)
Огоҳлантиришлар: Санжар Асқаралиев (13), Темур Султонов (26)
Четлатиш: Санжар Асқаралиев (74-иккинчи огоҳлантириш)
ШЎРТАН: А. Корнейчук, А. Алиқулов, Ҳ. Каримов, А. Мерзляков, О. Жўрабоев, О. Валижонов, Т. Соро (П. Агбо – 76), В. Афонин, В. Пономарёв (А. Амонов – 65), И. Таран (В. Рущницкий – 67), М. Мамазулумов.
НАВБАҲОР: Д. Романенко, А. Тоиров, Т. Султанов, В. Почуев, М. Белих, С. Аскаралиев, И. Бойдадаев, В. Чекунов (А. Аҳмедов – 60), Ғ. Жўраев, А. Фоменко (С. Ҳамидов – 83), А. Султонов (А. Абдуллаев – 52).
Бош ҳакам: Ильгиз Танташев (Бухоро)
