"Манчестер Юнайтед" ярим ҳимоячиси Поль Погба вакили клубнинг у билан шартномани узайтириш таклифи ҳақидаги миш-мишларни рад этди.

Аввалроқ Британия ОАВларида "Манчестер Юнайтед" янги шартнома шартларига кўра, 28 ёшли ярим ҳимоячига ҳафтасига 500 минг фунт маош тўлашга тайёрлиги ҳақида хабарлар тарқалган эди.

Ушбу ёзда француз ва "Юнайтед" ўртасидаги амалдаги шартнома муддати тугайди. Футболчи клуб билан ҳамкорликни давом эттиришга рози бўлмаса, эркин агентга айланади.

"ОАВда пайдо бўлган маълумотларга ойдинлик киритмоқчимиз. Поль сўнгги ойларда шартномани узайтириш бўйича ҳеч қандай таклиф олмаган.

У ҳозир бор эътиборини жароҳатидан тезроқ тузалиб, жамоага ёрдам беришга қаратган”, - деди Погба вакиллари.